मकवानपुर । हेटौँडा उपमहानगरपालिका वडा नम्बर १५ का आयूष बोम्जनलाई ‘मिस्टर नेपाल २०२४’ प्रतियोगितामा विजयी गराउने उद्देश्यले हेटौँडामाअभियान शुरु भएको छ । टोल विकास संस्था समन्वय समिति हेटौंडा १५ ले आज एक विशेष कार्यक्रमको आयोजना गरी यस अभियानको औपचारिक शुभारम्भ गरेको हो ।
‘मकवानपुर हेटौंडा नगरवासीको शान, मिस्टर नेपाल आयूष बोम्जन जिताऔं अभियान’ भन्ने नाराको साथ अभियान शुरु भएको हो । टोल विकास समन्वय समिति हेटौंडा १५ का अध्यक्ष सिंह बहादुर विश्वकर्माको अध्यक्षतामा आयोजित कार्यक्रममा बोल्दै हेटौंडा उपमहानगरपालिका वडा नम्बकर १५ का अध्यक्ष सुनिल मोक्तानले आयूषलाई मिस्टर नेपाल २०२४ को विजेता बनाउन सम्पूर्ण नगरवासीलाई एकजुट हुन आह्वान गरे । प्रतियोगितामा विजयी हुन प्रस्तुति र भोटिङ दुवैको महत्व रहने भएकोले अध्यक्ष मोक्तानले सबैलाई भोटिङ प्रक्रियामा सक्रिय सहभागिता जनाउन र आर्थिक सहयोग समेत गर्न अपिल समेत गरे ।
कार्यक्रममा हेटौंडा उपमहानगरपालिका वडा नम्बर १० का अध्यक्ष फुर्वा दोर्जे लामा, वडा नम्बर ११ का अध्यक्ष जुना दाहाल, भीमफेदी गाउँपालिका वडा नम्बर ४ का अध्यक्ष सागर पाण्डे, युवा नेता सन्तोष चौलागाईं, आरती पाठक, नरेन्द्र भण्डारी, प्रेस चौतारी मकवानपुरका अध्यक्ष बालकृष्ण अधिकारी लगायतले आयूषलाई भोट गरेर जिताउन आग्रह गरेका थिए ।
आयूष भोटिङ राउण्डमा पुगेका छन् । मिस्टर नेपाल २०२४ प्रतियोगितामा आयूष बोम्जनको भोटिङ कोड ६ रहेको छ । भोट हाल्नका लागि ई–सेवा एप डाउनलोड गर्नुपर्नेछ । एपमा भोटिङ र इभेन्ट सेक्सनमा गएर ‘मिस्टर नेपाल’ को भोटिङ अप्सनमा गई कोड ६ छनोट गरेर भोट दिन सकिन्छ । प्रतियोगिताको आयोजक नेक्स्ट मोडल्स नेपालका अनुसार १८ देखि ३२ वर्ष उमेर समूहका युवाहरूलाई यस प्रतियोगितामा सहभागी हुने अवसर प्रदान गरिएको थियो । विजेताले मिस्टर वल्र्ड २०२४ वा मिस्टर ग्लोबल २०२४ मा नेपालको प्रतिनिधित्व गर्ने अवसरका साथै नगद पुरस्कार र विभिन्न उपहारहरू प्राप्त गर्नेछन् ।
