मकवानपुर, २१ मंसिर । हेटौँडा–सिन्धुली सडकखण्डअन्तर्गत मकवानपुरको बकैया गाउँपालिका ४, पाङदुरेमा बुधबार अटो दुर्घटना हुँदा एकैपरिवारका ३ सहित ५ जना घाइते भएका छन् ।
बुधबार दिउँसो १ बजेर ५० मिनेटको समयमा हात्तीसुँडेबाट जुरेलीतर्फ आउँदै गरेको बागमती प्रदेश ०३–००१ ह ३३९ नम्बरको अटो आफै अनियन्त्रित भएर दुर्घटना भएको हो । अटो दुर्घटना हुँदा घाइते भएकामध्ये एक जनाको स्वास्थ्य अवस्था गम्भीर रहेको र अन्य चारको मध्यम रहेको प्रहरी प्रहरीले जानकारी दिएको छ ।
गम्भीर घाइते हुनेमा बकैया–३, जीतदमारका १२ वर्षीय सृजल जिम्बा रहेका छन् । दुर्घटना हुँदा जिम्बाको पेटमा गहिरो चोट परेको छ । अटो दुर्घटना हुँदा जिम्बाका बुबा ३४ वर्षीय देवलाल जिम्बा र आमा ३१ वर्षीया ठुलीमाया मध्यम घाइते भएका छन् । यस्तै बकैया–४ की २६ वर्षीया सुनिमाया भ्लोन र बकैया–५ का १२ वर्षीय युदिर बोगटी घाइते भएका छन् । घाइतेको उपचारका लागि हेटौँडा अस्पताल ल्याइएको प्रहरीले जनाएको छ ।












