मकवानपुर, २४ माघ । मकवानपुरको हेटौँडा–६ स्थित गौरिटार रंगशालामा जारी ‘छैटौँ स्थानीय तह सहिद स्मृति मकवानपुर गोल्ड कप अन्तर्गत आज सेमिफाईनलको पहिलो खेल हुँदैछ ।
आयोजक मकवानपुर जिल्ला फुटबल संघका अनुसार खेल दिउँसो ठिक ३ बजे सुरु हुनेछ । प्रतियोगिता अन्तर्गतको यो पहिलो सेमिफाईनल खेल हो । सेमिफाईनलको पहिलो खेलमा बुधबार धनकुटाको राजारानी क्लबले न्युरोड टिम (एनआरटी) सँग प्रतिस्पर्धा गर्नेछ । त्यस्तै बिहीबार बागमती युथ क्लब सर्लाही र सशस्त्र प्रहरी बल –एपिएफ) ले फाईनल प्रवेशका लागि प्रतिस्पर्धा गर्नेछ ।
मंगलबार भएको अन्तिम क्वाटरफाईनलमा एपिएफले ललितपुरको थ्रीस्टार क्लबलाई ४–० गोल अन्तरले पराजित गर्दै सेमिफाईनलमा प्रवेश गरेको थियो । त्यस्तै एनआरटीले चर्च ब्वाईज युनाईटेडलाई हराउँदै सेमिफाईनलमा प्रवेश गरेको हो भने बागमती युथ क्लब सर्लाहीले रिगल हेटौँडा रिसोर्ट एन्फा मकवानपुरलाई पराजित गर्दै सेमिफाईनलमा प्रवेश गरेको हो । त्यस्तै त्रिभुवन आर्मी क्लबलाई पराजित गर्दै राजारानी क्लब सेमिफाईनलमा प्रवेश गरेको हो ।
प्रतियोगिताको उपाधि विजेता टिमले १५ लाख रुपैयाँ र उपविजेता टिमले १० लाख रुपैयाँ सहित शिल्ड, मेडल तथा प्रमाणपत्र प्राप्त गर्नेछन् । प्रतियोगिताको सर्वोत्कृष्ट खेलाडीका लागि हेटौँडा–४ का व्यवसायी सन्तोष गौतमले ३ सय ५० सीसीको रोयल इन्फिल्ड बाइक प्रायोजन गरेका छन् । १२ वटा टिमहरुको सहभागिता रहेको प्रतियोगिताको फाइनल खेल यही माघ २७ गते हुनेछ ।
