मकवानपुर । बागमती गाउँपालिका वडा नम्बर ४ पाँचपाण्डवको बागमती पुल नजिक आज बिहान स्कारपियो दुर्घटना भएको छ। सिन्धुलीबाट हेटौंडातर्फ जाने क्रममा मकवानपुर र सिन्धुली जोड्ने बागमती पुल नजिक उक्त स्कारपियो अनियन्त्रित भई दुर्घटना भएको चालक दिपक परियारले बताएका छन् ।
बिहान करिब ७ः५० बजे बागमती प्रदेश बि ए डी ७३४६ नम्बरको कालो रङको स्कारपियो दुर्घटना भएको हो । स्कारपियोमा ५ जना सवार थिए । दुर्घटनामा परि चालक उदयपुर जिल्ला कटारी नगरपालिका ४ निवासी वर्ष ३६ को दिपक परियार, कटारी नगरपालिका निवासी वर्ष ५३ को राजिव थापा, वर्ष ४७ को पुष्पा थापा र मोरङ जिल्ला बिराटनगर महानगरपालिका वडा नम्बर १६ निवासी वर्ष ६८ को हरि थापा सामान्य घाइते भएका छन् ।
त्यस्तै मोरङ जिल्ला बिराटनगर महानगरपालिका वडा नम्बर १६ निवासी वर्ष ६५ को लक्ष्मी थापा गम्भिर घाइते भएका छन् । घाईतेहरुलाई स्थानीय सान्भी पोलिक्लिनिक मेडिकलमा सामान्य उपचार पश्चात् थप उपचारको लागि हेटौंडा ल्याइएको छ ।
