मकवानपुर । हेटौंडा उपमहानगरपालिका वडा नम्बर ५ स्थित पिप्लेक्याम्पा रंगशालामा आजेदेखि तेस्रो राष्ट्रिय भेट्रान्स फुटबल प्रतियोगिता सुरु भएको छ । हेटौँडा उपमहानगरपालिकाको मुख्य प्रायोजन तथा रोटरी क्लब मकवानपुरको आयोजनामा प्रतियोगिता सुरु भएको हो ।
प्रतियोगिता पिप्ले युवा क्लबको सहआयोजनामा भएको हो । प्रतियोगिताको उद्घाटन हेटौँडा उपमहानगरपालिकाकी मेयर मीनाकुमारी लामाले गर्नुभएको छ । प्रतियोगितामा विभिन्न जिल्लाका १५ भेट्रान्स क्लबको सहभागिता रहेको छ । २०७२ र २०७३ सालमा सम्पन्न पहिलो र दोस्रो संस्करणको उपाधि चितवन भेट्रान्सले जितेको थियो । प्रतियोगिताको फाइनल खेल भदौ ३१ गते हुनेछ ।
आज भएको उद्घाटन खेलमा नागस्वती भेट्रान्स हेटौँडा र चितवन भेट्रान्सबिच प्रतिस्पर्धा भएको छ। प्रतियोगिताको उपाधि विजेता टिमले २ लाख २हजार २ सय २२ रुपैयाँ र उपविजेता टिमले १ लाख १ हजार १ सय ११ रुपैयाँसहित शिल्ड, मेडल तथा प्रमाणपत्र प्राप्त गर्नेछन् ।
